“འདས་པའི་ཆོས་ལ་རྟོག་གོ །མ་འོངས་པའི་ཆོས་ལ་རྟོག་གོ །ད་ལྟར་འབྱུང་བའི་ཆོས་ལ་རྟོག་གོ །དེ་དག་གིས་བརྟགས་ནས་མིང་དང་གཟུགས་ལ་མངོན་པར་ཞེན་ཏོ།།” འཕགས་པ་བརྒྱད་སྟོང་པ་ལས།
གཉིད་ལས་སད་དུས་ད་དུང་སྔ་པོ་ཡིན་པ་ཚོར། ཁ་པར་ལ་བལྟས་པས་སྔ་དྲོའི་ཆུ་ཚོད་དྲུག་པ་རེད། ཆུ་ཚོད་དྲུག་པར་འཆར་ཅན་གཉིད་སད་ཡོང་བ་འདི་གོམས་གཤིས་ཤིག་རེད།
བོད་པས་དགོང་མོ་མི་ཉལ་རྟ་དང་འདྲ། ཞོགས་པ་མི་ལངས་བ་དང་འདྲ་ཞེས་ངན་པར་བརྩི་སྲོལ་ཡོད་ཀྱང་། སྔ་མོ་ངས་མཚན་ཕྱི་པོ་བར་མི་ཉལ་ཅིང་། ཞོགས་པ་ཕྱི་པོ་བར་མི་ལངས། དེ་ཡང་སློབ་གྲྭར་ཡོད་དུས། སློབ་གྲོགས་འགའ་ཞིག་ཕྲན་ལ་འགྲན་སེམས་ཆེ་བས། ངས་ག་དུས་སློབ་སྦྱོང་བྱས་ནའང་ཁོང་ཅག་མི་བདེ་བ་ཆགས་འགྲོ། དེ་བས་ངས་ཉིན་མོ་ཟ་ཁང་དང་ཇ་ཁང་དག་ཏུ་འཁྱམས་ནས་གང་དགའ་གང་སྐྱིད་བྱས། མཚན་ཕྱི་པོ་གཞན་རྣམས་གཉིད་ཁུག་ཚར་དུས། དཔེ་ཀློག་དང་གཞུང་དོན་སྦྱངས་པས་གོམས་གཤིས་དེ་འཇགས། ལུས་ལ་རྩོལ་བ་ཆུང་བས་ཤ་རྒྱས། ཁམས་ཉོག །ཐ་མ་འཕྲོད་བསྟེན་གྱི་དཀའ་ངལ་འཕྲད་པས་ ༢༠༠༨ ལོ་ནས་མི་འདོད་བཞིན་དུ། ཞོགས་པ་ཆུ་ཚོད་དྲུག་པ་ནས་ལངས་ཏེ། ཕྱག་འཚལ་བསྐོར་སྦྱོང་བྱེད་པར་གཞོལ། དེ་ནས་རིམ་གྱིས་གོམས་ཏེ་དེང་སང་གུང་གསེང་གི་སྐབས་སུའང་ཆུ་ཚོད་དྲུག་པར་གཉིད་སད་འོང་།
དེ་རིང་སྔ་པོ་ནས་གཉིད་སད་རུང་ལངས་འདོད་མི་འདུག །ཧ་ལམ་གཟུགས་པོར་ཤུགས་མེད་པ་ལྟ་བུར་ཚོར། དེ་ནི་ཕལ་ཆེར་ཁ་སང་ནས་ཆམ་ནད་ཅིག་ཕོག་པ་དེས་བྱས་པ་འདྲ། མལ་དུ་ཉལ་བཞིན་མིག་ཧུ་རེར་སྒང་གི་ཐོག་ལ་བལྟས། དེ་ནས་འོག་གི་ཉལ་ཁྲིར་བལྟས། དེ་ནས་ཉལ་ཁང་། ད་དུང་ཁ་པར་ ་ ་ དེ་ཚོར་བལྟ་བཞིན་ང་ཚོའི་འཚོ་བའི་ནང་ལ་གྲུ་བཞིའི་དབྱིབས་དེ་མང་བ་ལ་ཨ་དྲན།
ཞོགས་པ་མལ་ལས་ལྡང་སའི་ཉལ་ཁྲི་དེ་གྲུ་བཞི་ནར་མོ་ཞིག་རེད། ལག་ཏུ་བླངས་ནས་བལྟ་སའི་ཁ་པར་དེ་ཡང་གྲུ་བཞི་ནར་མོ་ཞིག་རེད། སྡོད་སའི་ཁང་པ་དང་བལྟ་སའི་བརྙན་འཕྲིན་དེ་ཡང་གྲུ་བཞི་རེད། གང་སར་འགྲིམས་ཤིང་འགྲུལ་སའི་སྣུམ་འཁོར་དང་མེ་འཁོར། འགྲུལ་འཁོར་དག་ཀྱང་གྲུ་བཞི་རེད། ད་དུང་གློག་ཀླད་དང་གློག་གི་སམ་ཊ། ནག་པང་དང་དཀར་པང་། ཐ་ན་རོ་སྒམ་ཚུན་ནས་གྲུ་བཞིའི་དབྱིབས་རེད། ང་ཚོ་གྲུ་བཞིའི་ནང་དུ་སྐྱེས། གྲུ་བཞི་བཀོལ་ནས་འཚར། གྲུ་བཞིའི་ནང་དུ་འཆི་འགྲོ་བ་འདྲ། གྲུ་བཞི་འདི་གནད་ཆེ་བས། དཀྱིལ་འཁོར་མང་པོ་ཞིག་ཀྱང་གྲུ་བཞི་པ་དང་། སངས་རྒྱས་ཀྱི་བསྟན་པ་ཡང་གྲུ་བཞི་ལམ་འཁྱེར། སྤྱི་དོན་ཡང་འཕྱར་གྲུ་མཉམ་འདེགས་ཟེར་རང་ཟེར་ལ་ཡིན་ཡང་ཡིན་པ་འདྲ།
གློ་བུར་དུ། ཐྲག་ཐྲག་གི་སྒྲ་དང་བཅས་ངའི་བཟའ་ཟླ་ཉལ་ཁང་གི་སྒོར་འཛུལ་འོང་། ངས་རྩེད་མོ་དང་སྦྲགས་ད་དུང་གསོན་པོར་བསྡད་ཡོད། གློག་སྦར་ན་འགྲིག་ཅེས་བཤད་པས་ཁོང་གིས་གློག་སྤར། ཆམ་ནད་འདི་ཁོང་ལ་མ་བགོ་བའི་ཆེད་དུ་མདང་དགོང་ངེད་གཉིས་ལོགས་སུ་ཉལ། ཁོང་གིས་ང་ལ་ཁམས་འདྲི་བྱས་རྗེས་ཐབ་ཚང་དུ་སོང་ནས་ཇ་མངར་མོ་ཕོར་པ་གང་ངའི་གམ་དུ་བསྐྱལ། མདང་དགོང་གི་ཟླ་དཀར་ལ་བལྟས་ན། སང་ཉིན་ཚེས་ཆེན་བཅོ་ལྔ་ཡིན་པ་འདྲ་ཟེར། ངས་ད་དེ་འདྲ་ཞིག་ལ་སླེབས་ས་ཡོད་ཅེས་བཤད། ཇ་འཐུང་བཞིན་ཁ་པར་ཁ་ཕྱེ་ནས་སྐད་འཕྲིན་ལ་བལྟས་པས། ངའི་འཛིན་གྲོགས་གཅིག་པའི་ཚོགས་པ་ཞིག་གི་ནང་སྐད་ཆ་གསར་པ་ཉི་ཤུ་ལྷག་ཅིག་བཤད་འདུག་པས། མཐོང་བ་ཙམ་གྱིས་ད་ཉན་ཐུབ་ས་མ་རེད་དྲན། དེའི་འོག་དེར། ཆུ་ངོགས་འཁྱམས་པོས། སང་ཉིན་བོད་ཚེས་བཅོ་ལྔ་ཡིན་པས་དཀར་ཟས་ལ་རོལ་བར་སྨོན་ཞེས་པའི་འཕྲིན་ཐུང་ཞིག་བཏང་འདུག །ཆུ་ངོགས་འཁྱམས་པོ་ནི་སིད་ཎི་གྲོང་ཁྱེར་དུ་ཡོད་པའི་དགེ་འདུན་པ་ཞིག་ཡིན་ཞིང་། ཁོང་གིས་ང་ལ་འཆར་ཅན་འཕྲིན་ཐུང་རེ་མ་ཆད་པར་བཏང་ཡོང་བ་ནི་སྔ་དྲོ་བདེ་ལེགས་དང་། ལྷག་དཀར་བཟང་། ཚེས་བཟང་དུས་བཟང་གི་དྲན་སྐུལ་བཅས་རེད། ད་ཆ་དེ། ཆེ་རུང་ཆུང་རུང་ངའི་འཚོ་བའི་ཆ་ཤས་འདྲ་པོ་ཞིག་ཆགས་འདུག །ཁོང་གིས་འཕྲིན་ཐུང་དེ་ག་དུས་བཏང་འདུག་ལྟ་སྐབས། དེ་ནི་མདང་དགོང་བཏང་འདུག་པས་ངས་ལམ་སེང་བཟའ་ཟླ་ལ། ཕལ་ཆེར་ཚེས་ཆེན་བཅོ་ལྔ་དེ་རིང་ཡིན་ས་རེད་དོ།། ཞེས་བཤད། བཟའ་ཟླས་དེ་འདྲ་ཡིན་ན། དེ་རིང་མཆོད་འབུལ་དང་དཀར་སྐྱོང་བྱ་དགོས་ཟེར་བས། ངས་དོ་དོ་ཏན་ཏན་བཟོ་ཆེད་ལོ་ཐོར་བལྟས་པས། དེ་རིང་ཚེས་ཆེན་བཅོ་ལྔ་ཡིན་པ་མ་ཟད། དཔལ་དུས་ཀྱི་འཁོར་ལོའི་དུས་ཚེས་དམིགས་བསལ་བ་ཞིག་ཀྱང་ཡིན་པ་ཤེས།
