རྫ་ཚེ་རིང་བཀྲ་ཤིས།
ཉེ་ཆར་ངས་པཎ་ཆེན་ཤཱཀྱ་མཆོག་ལྡན་གྱི་ལྟ་གྲུབ་དང་འབྲེལ་བའི་བརྒལ་ལན་གྱི་རྩོམ་དེབ་ཅིག་མཇལ། རྩོམ་པ་པོའི་མཚན་ལ་ཟི་ལུང་པ་བསྟན་པ་བཟང་པོ་ཞེས་བྲིས་འདུག །ངས་དངོས་སུ་མཇལ་མྱོང་ཡོད་མེད་གསལ་པོ་ཞིག་མི་དྲན་ཡང་ཁོང་ནི་ད་ལྟ་དཔལ་རྫོང་སར་བཤད་གྲྭར་སློབ་གཉེར་གནང་བཞིན་པའི་གྲྭ་པ་ཞིག་རེད་འདུག །དེ་ཡང་རྫོང་སར་བཤད་གྲྭའི་ཕྱིས་ཀྱི་སློབ་གཉེར་པ་གསར་པའི་ཁྲོད་དུ་འདི་འདྲའི་དཔྱད་བརྗོད་སྤུས་དག་འབྲི་མཁན་ཕེབས་བཞིན་པ་དེར་དགའ་སྤོབས་ཀྱི་ཚོར་སྣང་བཅོས་མིན་བྱུང་།
ན་དཀའ་ན་སློབ་གཉེར་གནང་བཞིན་པའི་གཞོན་སྐྱེས་ཤིག་གི་རྩོམ་ཡིག་ལ་དེ་བས་ཀྱང་སྨོས་མ་དགོས་པ་ཞིག་རེད། མ་ཟད་སྒེར་ངོས་ནས་ནི་དགག་སྒྲུབ་ཞུ་ཡུལ་དང་ཁོང་གཉིས་ཀྱི་སུ་ཞིག་བདེན་དང་མི་བདེན་གྱི་ཕྱོགས་ལ་སྒེར་གྱི་ལངས་ཕྱོགས་ཀྱང་མེད་མོད། སྤྱིར་པཎ་ཆེན་ཤཱཀྱ་མཆོག་ལྡན་དང་ཁོང་གི་གཞུང་ལུགས་ནི་དཔལ་ལྡན་ས་སྐྱ་པའི་སྔོན་བྱོན་དམ་པ་གོང་མའི་ཤེས་རབ་ནོར་བུའི་ཕུང་པོའི་དབུས་ཀྱི་ཧ་ཅང་གལ་ཆེ་བའི་ཆ་ཤས་ཤིག་ཡིན་པས་དམིགས་ཀྱིས་ཁོང་གི་གཞུང་ལུགས་ཀྱི་གནད་ལ་བསམ་བློ་གཏོང་མཁན་དགོས་པ་འདི་ཧ་ཅང་གལ་ཆེ།
