ན་གཞོན་བྱིས་པ་ཆུང་ཆུང་ཚོ། སྐུ་ཁམས་བཟང་། རྒྱ་གར་ལྷོ་ཕྱོགས་སུ་བོད་ཀྱི་དགེ་བཤེས་བཟོད་པ་ཟེར་བ་ཞིག་ཡོད། ཁོང་དུས་རྒྱུན་དུ་སློབ་སྦྱོང་ལ་དགའ་བ་དང་། སྤྱང་གྲུང་འཛོམས་པོ་ཞེ་དྲག་ཡོད།
ཉིན་ཞིག་ཞོགས་པ་སྔ་པོ་ཕྱག་ཚོད་གསུམ་པ་ཙམ་ལ་གསང་སྤྱོད་ལ་ཕེབས་དུས། གློ་བུར་དུ་ཁོང་གི་སྒོ་འགྲམ་ན་རི་ཙི་ཆེན་པོ་ཞིག་མཐོངས། ཁོང་ཧང་སང་། གང་ཡིན་ཟེར་ན། དུས་རྒྱུན་དུ་རི་ཙི་ཆེན་པོ་དེ་འདྲ་ཕྱོར་ལོག་ན་མཐོང་ཡང་། ཁོང་ཚོའི་གྲྭ་ཤག་གི་སྒོ་འགྲམ་དུ་རྩ་བ་ནས་མཐོང་མྱོང་མེད། སྐབས་དེར་ཁོང་གི་ཤག་གྲོགས་ཚང་མ་གཉིད་ཁུག་ཞིང་། ཉལ་ཁང་གི་ཕྱིར་ལོག་ཏུ་ཁུ་སིམ་མེར། གསལ་ལ་མི་གསལ་བའི་གློག་འོད་ཁྲ་ལྷམ་ལྷམ་འགའ་ཤས་ལས་ཅི་ཡང་མེད། དགེ་བཤེས་བཟོད་པ་ལགས་ཀྱིས་རི་ཙི་ཆེན་པོ་དེ་སྒོ་འགྲམ་ནས་ཕྱིར་ལོག་ཏུ་ཕུད་མགོ་བརྩམ། ཁོང་གི་ལག་ཏུ་ལག་ཆ་ཅི་ཡང་མེད་པར་ཡུན་རིང་རི་ཙི་དེ་དེད་ཀྱང་། རི་ཙིས་དགེ་བཤེས་ལགས་ལ་ངར་ངར་དང་བཅས་ཏེ་རྩ་བ་ཉིད་ནས་ཞི་འཇམ་ཐོག་ནས་ཕྱིར་ལོག་ཏུ་ཐོན་རོགས་མ་བྱས།དེ་ནས་དགེ་བཤེས་ལགས་ཀྱིས་གྲྭ་ཤག་ཁག་གི་སྒོ་འགྲམ་དུ་བཞག་པའི་བསིལ་ལྷམ་དང་རྐང་པ་ཕྱི་སའི་ས་གདན་སོགས། ལག་པར་གང་རགས་བེད་སྤྱོད་མ་གཏོང་ཀ་མེད་འགྱུར། གྲྭ་ཤག་ཁག་གི་སྒོ་འགྲམ་ནས་རི་ཙི་དེར། ཕར་ཕར་དེད་པ་དང་། ཚུར་ཚུར་དེད་དེ། ཕྱག་ཚོད་ཕྱེད་ཀ་ཙམ་ཕྱིན། རི་ཙི་དེ་ཕྱིར་ལོག་སར་མ་ཤེས་པར་ཡུན་རིང་འགོར།
སྐབས་དེར་གྲྭ་པ་འགའ་ཤས་གཉིད་སད་དེ། སྒེའུ་ཁུང་ནས་མར་བལྟས་ཙམ། བལྟས་ཙམ་བྱས་སྐབས། དགེ་བཤེས་བཟོད་པ་ལགས་ཤིན་ཏུ་བྲེལ་བ་ཆེན་པོའི་ངང་ནས། ཕར་ཕར་རྒྱུག་པ་དང་། ཚུར་ཚུར་རྒྱུག་པ་མཐོངས་བ་ལས། གྲྭ་པ་གཞན་ཚོས་དགེ་བཤེས་ལགས་ཀྱིས་རི་ཙི་དེ་རྗེས་དེད་གཏོང་བཞིན་པ་རྩ་བ་ཉིད་ནས་མ་མཐོངས། དེ་བཞིན་ཁོང་ཚོས་བསམ་པར། དགེ་བཤེས་ལགས་ངོ་མ་ཤ་ཚ། ཤ་ཚ། མཚན་མོར་སེམས་བདེ་པོ་མེད་པར་འགྱུར་འདུག་བསམ།
མཐར་དགེ་བཤེས་ལགས་ཀྱིས་གྲྭ་ཤག་ནས། རི་ཙི་ཆེན་པོ་དེ་ཕྱིར་ཕུད་ཐུབ་པ་བྱུང་། དེ་ནས་དགེ་བཤེས་ལགས་གསང་སྤྱོད་ལ་ཕེབས་ནས། སླར་ཡང་གཟིམས་མགོ་བཙུགས། སྐབས་དེར་དགེ་བཤེས་ལགས་ཀྱི་སེམས་ནང་ལ་མ་བདེ་བར་ཞིག་ཡོད་པ་ནི། གྲྭ་ཤག་ཁག་གི་སྒོ་འགྲམ་དུ་བཞག་པའི་བསིལ་ལྷམ་རྣམས་རི་ཙི་ལ་བཞུད་པས་གང་སར་ཐོར། ཉིན་འགའ་ཤས་རིང་། དགེ་བཤེས་ལགས་ཉིན་མོར་སེམས་ཁམས་བདེ་ཡང་། མཚན་མོར་སེམས་ཁམས་བདེ་པོ་མེད་པའི་དཀྲོག་གཏམ་དེ། གྲྭ་ཤག་ཁག་གི་ཉེར་འཁོར་ཡོངས་ལ་ཁྱབ་ཏེ། དེ་ནས་གྲྭ་ཤག་གི་ཆོས་གྲོགས་འགའ་ཤས་ཀྱིས་བསྐུལ་མ་བྱས་ཏེ། དགེ་བཤེས་ལགས་ཀྱི་དགེ་ཕྲུག་འགའ་ཤས་ཆེད་དུ་མངགས་ནས་གཟིམ་ཤག་ལ་ཐུག་འཕྲད་དུ་ཡོང་སྟེ། ཁོང་ཚོས་སེམས་སྐྱོ་པོའི་ངང་ནས་ཞུ་དོན།”རྒན་ལགས་གལ་ཏེ་ཁྱེད་ཀྱི་སེམས་ནང་ལ་དཀའ་ངལ་འདྲ་ཡོད་ན། ཁ་གསང་སྟེ་ང་ཚོའི་རྒན་ལགས་ལ་ཡར་ཞུས་ན། ཆོས་ཕྱོགས་ཀྱི་ཞབས་རིམ་དང་མོ་འདེབས་རྒྱུ་སོགས་གལ་ཆེ་སྐོར་དང་། ཡང་ན། སྨན་ཁང་ལ་བསྟེན་རྒྱུ་གལ་ཆེ་པོ་རེད།” ཅེས་གསུངས།
དེ་ནས་དགེ་བཤེས་ལགས་ཧང་སང་བའི་རྣམ་འགྱུར་དང་བཅས་ཏེ་གསུངས་དོན། ”ང་བདེ་པོ་བདེ་རྐྱང་ཡིན། ཁྱེད་རང་ཚོ་ལ་ང་བདེ་པོ་མེད་པ་སུས་བཤད་སོང་ངམ།” ཞེས་དྲིས། དེ་ནས་དགེ་ཕྲུག་ཚོས་ཞེད་སྣང་ངང་ནས། གྲྭ་གྲོགས་གཞན་ཚོའི་བརྒྱུད་ནས་གང་ཐོས་བའི་གནས་ཚུལ་རྣམས་ཞུས་པས། དགེ་བཤེས་ལགས་ཧང་སང་སྟེ་གསལ་བཤད་བྱས་དོན། ”ཉིན་ཤས་སྔོན་ན་རི་ཙི་ཆེན་པོ་ཞིག་གྲྭ་ཤག་གི་སྒོ་འགྲམ་ན་བསླེབས་པས། དེ་ཕྱིར་ཕུད་མ་ཐུབ་ཏེ། ཕར་ཚུར་རྒྱུག་ཏེ་ཡུན་རིང་འགོར་སོང་མ་གཏོགས། ངའི་སེམས་ཁམས་འཁྲུགས་ཏེ་དེ་འདྲ་བྱས་པ་རྩ་བ་ཉིད་ནས་མ་རེད། དེ་ནས་དགེ་བཤེས་ལགས་ཀྱིས་མགོ་བོ་གཡུག་ཙམ། གཡུག་ཙམ་བྱས་ཏེ། དགེ་ཕྲུག་རྣམས་ལ་ནན་པོར་གསུངས་དོན། ”མ་འོངས་པར་སྤྱི་ཚོགས་ཀྱི་གནས་ཚུལ་གང་ཞིག་ལ་བརྟག་དཔྱད་ཡག་པོ་མ་བྱས་པར། མི་གཞན་པའི་ཕྱིའི་གཟུགས་ཙམ་ལ་ལྟ་ནི། མིང་ངན་འདོགས་པ་དང་གང་བྱུང་བཤད་མི་རུང་། ཁྱེད་ཚོ་ཕར་ཤག་ཏུ་ཕེབས། སེམས་བདེ་པོ་བྱོས། ང་བདེ་པོ་ཡིན།” ཞེས་བཤད། དུས་དེ་ནས་བཟུང་སྟེ། དགེ་ཕྲུག་རྣམས་ཀྱི་ཕྱིའི་སྐད་ཆ་གོ་ཚད་ལ་གཟབ་གཟབ་བྱེད་ཀྱི་ཡོད་པ་རེད།
༼མཆན། སྒྲུང་ཐུང་འདི་ནི་དངོས་སུ་བྱུང་བའི་གནས་ཚུལ་ཞིག་ལ་གཞི་རྩར་བཟུང་བ་ཡིན་ལ། མིང་ཚིག་བེད་སྤྱོད་གཏོང་སྟངས་སོགས་བྱིས་པ་ཚོ་རང་ལ་དམིགས་ཏེ་བྲིས་པ་ཡིན། རི་མོ་མཁན་ནི་ཨོ་གླིང་རི་སྔོན་པོར་བཞུགས་པའི་འཛིན་རིམ་དྲུག་པའི་བུ་བསྟན་འཛིན་རྒྱལ་པོ་ལགས་དང་འཛིན་རིམ་བདུན་པའི་སློབ་མ་བསྟན་འཛིན་འཛོམས་སྐྱིད་ལགས་ནས་བྲིས། བཀའ་དྲིན་ཆེའོ་ཞུ།༽
གཤམ་གསལ་དུ་སྒྲུང་ཐུང་འདིའི་ནང་ཡོད་པའི་མིང་ཚིག་གལ་ཆེ་ཁག་ཅིག
༡༽དགེ་བཤེས། ༢༽ རི་ཙི་ཆེན་པོ། ༣༽བསིལ་ལྷམ། ༤༽གྲྭ་ཤག ༥༽དཀྲོག་གཏམ། ༦༽དགེ་ཕྲུག ༧༽གསང་སྤྱོད། ༨༽བརྟག་དཔྱད། ༩༽སྤྱང་གྲུང་འཛོམས་པོ། ༡༠༽ ཆོས་གྲོགས།
